ብኣህጉራዊ መጋባእያ ገበን፡ ብናይ ውግእ ገበናት ዝድለ ሓደ ካብ ቀንዲ ሓለፍቲ ኣብ ሰሜን ዩጋንዳ ዝመደበሩ ተቃዋሚ ሓይሊ ብሰራዊት ዮጋንዳ ከምእተቐትለ ሳንደይ ታይምስ ዝተባህለ ጋዜጣ ኣፍሊጡ። እዚ ተቐቲሉ ዘሎ ብራስካ ሉክዊያ ዝፍለጥ ኮይኑ ሓደ ካብ ሓሙሽተ መራሕቲ ናይቲ ብ LRA ዝፍለጥ ተቓዋሚ ሓይሊ ምኾኑን ሓደ ካብቶም ብኣህጉራዊ መጋበእያ ገበን ኣብ ቲሕቲ ቀይዲ ክኣትዉ ዝተረቑሑን ምኾኑ እቲ ዜና ብተወሳኺ ሓቢሩ። ኣህጉራዊ መጋበእያ ገበን ንሉክዊያ ብኣርባዕተ ናይ ውግእ ገበናት፤ ገበን ኣንጻር ሰብኣውነት፤ ባርነትን መጥቃዕቲ ኣብ ልዕሊ ሲቪላውያን ከምዝኽሰስ እዩ ዝፍለጥ።

መንግስቲ ዩጋንዳን እቲ ተቓዋሚ ሓይልን ቶኽሲ ደው ምባል ክሰማምዑ ብዘይምክኣሎም እቲ ኣብ ደቡባዊት ከተማ ጁባ ዝገብርዎ ዝነበሩ ናይ ሰላም ዝርርብ ከምእተደናጎየን ንኻልእ እዋን ከምእተመሐላለፈን ዝፍለጥ እዬ።